पुरंदर विधानसभा निवडणुकीसाठी वर्षा लांडगे निवडणूक निर्णय अधिकारी. ४ लाख ५८ हजार २८२ मतदार : निवडणूकीसाठी २ हजार १९८ कर्मचारी नियुक्त

 पुरंदर विधानसभा निवडणुकीसाठी वर्षा लांडगे निवडणूक निर्णय अधिकारी. 

४ लाख ५८ हजार २८२ मतदार : निवडणूकीसाठी २ हजार १९८ कर्मचारी नियुक्त 

पुरंदर : 

      महाराष्ट्र राज्यातील विधानसभेच्या २८८ जागांकरीता विधानसभा सार्वत्रीक निवडणूक २०२४ चा कार्यक्रम जाहिर झाला आहे. २०२ पुरंदर विधानसभा मतदार संघासाठी श्रीमती. वर्षा लांडगे यांची निवडणूक निर्णय अधिकारी म्हणून नेमणूक करणेत आलेली असून व १ सहा. निवडणूक निर्णय अधिकारी यांची नेमणूक करणेत आली आहे. पुरंदर विधानसभा मतदारसंघामध्ये ४ लाख ५८ हजार २८२ मतदार असून, निवडणूक प्रक्रिया पार पाडणेसाठी २ हजार १९८ कर्मचाऱ्यांची नियुक्ती करण्यात आली आहे. मतमोजणी नवीन प्रशासकीय इमारत, सासवड (पुरंदर) येथे होणार असल्याची माहिती पुरंदरचे प्रशासनाने दिली आहे. 

        भारत निवडणूक आयोगाने दिनांक १५ ऑक्टोबर २०२४ रोजीच्या प्रसिध्दी पत्रकान्वये आयोगाने प्रसिध्द केलेल्या कार्यक्रमानुसार दिनांक १५ ऑक्टोबर पासून आचारसंहितेची अंमलबजावणी सुरू झाली आहे. २०२ पुरंदर विधानसभा मतदारसंघासाठी नामनिर्देशनपत्र निवडणूक निर्णय अधिकारी यांचा कक्ष. प्रशासकीय इमारत पहिला मजला, तहसिलदार कार्यालय सासवड (पुरंदर) या ठिकाणी मंगळवार दि. २२/१०/२०२४ ते मंगळवारी २९/१०/२०२४ या कालावधीत दाखल करता येतील. नामनिर्देशनपत्र छाननी बुधवार  दि. ३०/१०/२०२४ आहे. उमेदवारी मागे घेणे सोमवार  दि. ०४/११/२०२४ आहे. मतदान बुधवार दि. २०/११/२०२४ असून मतमोजणी शनिवार दि.  २३/११/२०२४ असा आहे. निवडणूक प्रक्रिया सुरळीत पार पाडण्यासाठी निवडणूक निर्णय अधिकारी यांच्या अधिपत्याखाली २३ विषय पथके, ११-SST, ९-FST, ४-VST आणि ३- VVT अशा विविध पथकांची नेमणूक करणेत आली आहे. 

     २०२ पुरंदर विधानसभा मतदारसंघामध्ये आज अखेर पुरूष मतदार २,३८,००१, स्त्री मतदार २,२०, २४९, इतर मतदार ३२ असे एकुण ४,५८,२८२ एवढे आज रोजी मतदार आहेत. त्यापैकी दिव्यांग मतदारांची संख्या ४०७५ व ८५ पेक्षा जास्त वय असणाऱ्या मतदारांची संख्या ८४२८ आहे. तसेच सैनिक मतदार ६१३ आहेत. सदर निवडणूक प्रक्रिया पार पाडणेसाठी २,१९८ मनुष्यबळाची नियुक्ती करणे प्रस्तावित आहे. मतदान यंत्रे ठेवणेसाठी तळ मजला, नवीन प्रशासकीय इमारत, सासवड (पुरंदर) येथे सुरक्षाकक्ष तयार करणेत आले आहे. त्याच ठिकाणी मतदान साहित्य वाटप व मतदान साहित्य स्विकारणेसाठी व्यवस्था करणेत येणार आहे. तसेच शनिवारी दि. २३/११/२०२४ रोजी मतमोजणी पार पाडण्यात येणार असल्याचे पुरंदरच्या महसूल प्रशासनाने प्रसिद्धी पत्रकाद्वारे कळविले आहे.